|
Oprichters
Veur 1956 was der in Drenthe gien podium waor schrievers heur waark publiceren kunt. Oetgevers gaven mar mondtiesmaot Drèenstaolig waark oet. In september 1956 wordt het maondblad Oeze Volk opricht deur Hans Heyting, Gerrit Kuipers en Gerard Nijenhuis. De oprichters hadden veur ogen um met Oeze Volk een leegdrempelig en veur elk en eein tougankelijk blad te maoken in de Drèense taol.
Eerste nummer
Dizze dreei maanlie risselveert met 'n kander, zeuikt een oetgever en gaot an 't waark. Oetgever Eerelman oet Stadkanaol duurt het an en het eerste nummer van Oeze Volk komp oet in december 1956.
Gasselternijveen
Nao verloop van tied kriegt Gerard Nijenhuis en Gerrit Kuipers boeten Drenthe een neeie betrekking. Hans Heyting blef alleneg over. In 1966 nemt Bart Veenstra en zien vrouw Martha de redaksie en de administraotsie over. Dit blef de femilie Hadderingh dooun tot en met 31 december 2007. Daorna hef Jent Hadderingh het overneumen.
Stichting
Op 1 janewaori 2008 wordt Oeze Volk een stichting en get over in het Huus van de Taol.
Veurplaot
Karakteristiek veur Oeze Volk was de zwart-wit veurkaant met een foto. Tot eind 1970 is dit een foto van Gerrit Aafs, dan nemt Wim Hidding het over tot en met 2006. Daornao zorgt de neeie redaksieleden Jent Hadderingh en Tjaart Imbos veur de foto's op de veurplaot. Met ingang van meert 2008 verschient der een neie veurplaot in kleur. Foto's veur de veurplaot wordt anleverd deur Drèense amateurfotograofen.
In meert 2008 hef Oeze Volk der een naom bijkregen: Maandewark.
De vörmgeving van het olde Oeze Volk was vanof het begun haost niet veraanderd. De tied hef het herkenbaore grieze bladtie inhaold.
Daorum is de stap zet um ‘fullcolor' en in een neie opmaok te verschienen.
Leegdrempelig en tougankelijk
Maandewark / Oeze Volk gef mensen die schrieft in het Drèens de kaans um te publiceren. Hiermet wul het blad het gebruuk en het lezen en schrieven in de Drèense Taol stimuleren.
Maandewark / Oeze Volk wordt oetgeven deur het Huus van de Taol.
Um die oetgaove meugelk te maoken is der een redaksie en een warkgroep insteld. De redaksie holdt zök gangs met de inhold en kwaliteit van het blad. De warkgroep is drok doende met de Public Relations en ondersteuning van de redaksie.
Stuur je wark in!
Bin je schriever van een gedicht of een verhaol, stuur het dan in veur publicaotie in Maandewark / Oeze Volk. Ok bijdraogen in de vorm van columns, verslaogen en zuks over activiteiten wordt op priessteld. Vanzölf in het Drèents.
De kopij het liefst insturen via e-mail:
Dit e-mail adres is beschermd door spambots, u heeft Javascript nodig om dit onderdeel te kunnen bekijken
Het postadres:
Huus van de Taol
Postbus 163
9410 AD Beilen
0593 371010
En dan?
As de kopij binnenkomp bij het Huus van de Taol kriej altied een bevestiging van ontvangst.
De redaksie bekek vervolgens alles wat of der via de lienpost of de postbus binnen komp.
Wordt je waark plaotst, dan kek een corrector het nao op vörm- en spelfouten. Je kriegt dan gien bericht, maar ziet je inzending vanzelf in Maandewark / Oeze Volk
Veurbehold
De redaksie beholdt zuk het recht veur um angeboden waark niet te plaotsen. Je kriegt schriftelijk bericht van de redaksie as je waark niet plaotst worden kan.
Warkgroepleden en redaksie Maandewark / Oeze Volk:
Redaksie en waarkgroepleden van Maandewark / Oeze Volk bint te bereiken via email:
redactie
Dit e-mail adres is beschermd door spambots, u heeft Javascript nodig om dit onderdeel te kunnen bekijken
of via redaksie Maandewark / Oeze Volk,
Postbus 163,
9410 AD BEILEN.
Roel Reijntjespries
Roel Reijntjes (1923-2003) was een Drèense dichter die veul beteikend hef veur de Drèense literatuur en de Drèense Taol. Hie debuteerde in 1959 met de gedichtenbundel ‘De iegelkaor'. Roel Reijntjes hef ok veul publiceerd in Oeze Volk. Hij hef Oeze Volk een legaat naolaoten, waorvan 't bestuur eeinmaol in de tweei jaor een pries oetlangen moet an eein die zich slim inzet hef veur de streektaol.
Ontvangers van de pries
2004: Wim Hidding oet Gasselte, meer dan 35 jaor fotograof veur Oeze Volk
2006: Martha Hadderingh oet Gasselternijveen. Eigenlieks was de pries veur Bart en Martha beiden veur 40 jaor redaksie en administraotsie en al wat nog meer. Jammer genog hef Bart dit niet meer met muggen maoken. Hie kwam in oktober 2005 oet de tied.
2008: Gerrit Kuipers, mede-oprichter Oeze Volk 
Correctie
Oetgangspunten die correctoren hanteert bij het naokieken op spelling van angeleverde teksten, veurdat zie plaotst wordt in Oeze Volk/Maandewark.
1.Wij broekt ‘Drentse Spelling’ as haandleiding veur het schrieven van alle plaotselijke streektaolen binnen Drenthe.
2.Wij schrieft dicht tegen het Nederlaands an, beveurbield:
Nederlaands: Drents:
prettig prettig
vriendelijk vrundelijk
aardig aordig
3.Liever gien woordtiekens en lettertiekens schrieven, as dat niet persé neudig is.
4.De niet oetspreuken -en wal altieding schrieven; dus poten in stee van poot’n.
5.Bij -eren en -elen, schrief wij: Gastern (Gasteren) en twiefeln (twijfelen).
6.Bij -enen, schrief wij: regen (regenen). Het giet regen. Ok zo bij tieken en zegen.
7.In lettergrepen en an het èende van een woord ao schrieven, en niet oa.
8.Bij een voltooid dielwoord zoas in ‘Ik heb zegd’, een d schrieven en niet een t.
9.De ou-klaank in het Nederlaands, mar in het Drents de ao- of de ò-klaank volgd deur ld of lt, dan in het Drents old of olt schrieven en niet aolde, olle of zukswat.
Dus houden - holden, zouten - zolten, hout - holt, goud - gold, oud - old, koud - kold.
10.De ö (met tuttelties) in beveurbield : törf, zölf, Grönning en het stöf (het stuift).
11.De d-klaank en de f-klaank wal altied schrieven, ok aj die haost niet heurt.
12.De r-klaank wal schrieven, ok al heur ij die aamperan.
13.De g wal altied schrieven, ok al heur ij die mangs een beetie aans; zoas in: wagen, negen, hugen (hunkeren) of togen (zeulen, slepen).
14.De sch-klaank kan broekt worden in woorden die overienkomt met woorden oet het Nederlaands, mar ok in woorden as: mèenschen en tusschen. De sk-klaank mag hier ok.
15.Samentrekkings met ik schrief wij altied: ’k. Dus: heb ik – he’k. Samentrekkings met ij of ie, nao de letter i altied 'j broeken; aans vast schrieven.
16.De letter e wordt ok wal schreven in stee van hie: hef e daor west; dat zeg e.
17.Verkleinwoorden: het grondwoord niet veraandern!
beet - beetien of beetie, dier - diertien of diertie, ding - dinggie of dinggien
18.Verkleinwoorden op -cht, -ft, en -(r)st vervalt de -t bij het schrieven, aj hum niet heurt; waor neudig tredt daornao metklinker-verdubbeling op:locht - lochie(n),kast-kassie of kastien,wicht-wichtien of wichien,nust-nussie of nustien,schoft-schoffie,barst-barsie of barstien
19.Drentse zinsbouw broeken!
Dus: ‘Mooi dat het zo goed gaon is’, in stee van: 'Mooi dat het zo goed is gaon'.
‘Ik heb dan staon laoten’, in stee van: ‘Ik heb dat laoten staon.’
En: ‘Dat hie kommen zul, wus zie’, in stee van ‘Dat hie zul kommen, wus zie.’
20.Voltooide dielwoorden van samenstelde warkwoorden anien schrieven, krek as in het Nederlaands: 'Hie hef metnummen. Zie is vortgaon. Het is deurbreuken.’
21.As in een tekst ienmaol begund is met een bepaolde schriefwieze van een woord, dan niet veraandern beveurbield: eerst maor schrieven, dan mor of mar, of toch mar weer maor.
22.Nao een dubbele punt ( : ) gien heufdletter schrieven. Woj dat toch, dan moej nao de " : " de volgende woorden tusschen apostrofs zetten.
23.Vervang Nederlaandse woorden zoas desalniettemin en eventueel, deur Drentse woorden.
(Koop Bos)
Criteria veur plaotsing in Maandewark/Oeze Volk
Veurof
1. Kopij mag niet striedig wezen met het redactiebeleid.
2. M/OV is een leegdrempelig blad dat veur elk toegankelk is. Het wil de schriever een podium bieden. Kopij die geschikt is, wordt opeslagen in een ‘schrieversmap’. Het kan in ien van de volgende nummers an bod komen, mar ok bewaard worden veur een aander tiedstip. Schrievers kriegt daor gien bericht van.
3. Kopij wordt redigeerd en dan deur de corrector corrigeerd op spelling en taoluniformiteit. Over het leste viendt gien correspondentie plaots met de schriever. De corrector warkt volgens de officiële spellingsregels veur de Drèentse taol. Over het redigeren kan der contact weden.
Uutwarking
1. Kopij mag gien tekst(en) bevatten die godslasternd, discriminerend, kwetsend, beledigend, minachtend, opruiend en/of respectloos e.d. bennen. Ien veurkommend geval beholdt de redactie zuch het recht veur om de schriever een veurstel te doen of ien overleg met de schriever te kommen tot vervanging van de betreffende tekst. De schriever blef eindverantwoordelijke en eigenaor van de kopij en hef altied het recht om niet akkoord te gaon met het wiezigingsveurstel en kan de kopij intrekken.
2. Kopij kan weigerd worden um praktische reden beveurbield umdat der gien ruumte veur is of vunden kan worden, der te veul wark met dezölfde strekking is e.d. en um inholdelijke reden: (nog) langdraodig, niet boeiend, niet pakkend, het raokt niet, onsaomenhangend, structuurloos, volgorde klopt niet en/of verhaolopbouw e.d. klopt niet.
3. Ien veurkommend geval (1 en 2) kreg de schriever een brief met de reden waorom het wark niet plaotst wordt.
4. Schrievers van kopij dat nog niet an de criteria voldöt, kunt contact opnemen met het Huus van de Taol um nao te gaon hoe of heur wark verbeterd worden kan. Zie punt 3.
5. Bovenstaonde mag der niet toe leiden dat de uutgangspunten van M/OV, naomelijk leegdrempelig en veur elk toegankelk, uut het oog verloren worden. De redactie holdt veur ogen dat te plaotsen kopij past binnen het brede scala van schrievers en leesders en mag niet kritisch oordelen op subjectiviteiten as ‘mien smaok niet’, ‘heb der niks met’, etc. De doelstelling moet wezen en blef : ‘veur elk wat wils.’ (Klaas Koops)
Wij kriegt de kopij graag digitaal aneleverd. Stapsgewies giet dat zo:
HULP BIJ DOCUMENTEN-MAILEN
1. Maak een document ( verhaal, of gedicht) an in WORD.
Gebruuk daorbij het lettertypeTimes New Roman – 12.
2. Opslaon: Kies: Bestand – Opslaan als – Mijn Documenten –
(dan: de goeie naam geven) – Opslaan.
3. Maak een nei email-bericht an, via OFFICE.
Vertel daorin wat aj te melden hebt..
4. Voeg an dit email-bericht het document toe
wat aj ók verzenden wilt:
-Klik op het paperclippie, en kies:
dus: het ‘document’ anklikken – Invoegen.
Nou stiet het document as aparte bijlage
bij het email-bericht. (Dat kuj ók zien !)
5. Aj dat wilt, kunt er zo meerdere documenten
an de email toe-evoegd worden.
Ze bint dan ok
deur de ontvanger apart te bekieken en die kan
ze ok apart opslaon en verwarken.
6. Aj zó een email klaor hebt, klik ie op Verzenden.
Inhold
Van elk nummerwordt twee verhaolen/gedichten op de webstee zet. Zo kriej een indruk van het blad.
Veur nummer 4 bint dat:
Het hoge woord.
Beate Plenter.
Toen e kwam um het te vertellen zunk hum al op het tuunpad de moed in de schoenen. In de auto haar e repeteerd hoe of e het zul anpakken. Eerst rustig zitten met een koppie koffie. Zien mam drok in de weer met de bloemen die op de achterbank lagen. Dan nao eerst vraogd te hebben naor wel der dood was of wie der trouwd waren, zul e der over begunnen.
Waren der vermoedens bij de oldelu? Waren ze deur de praoties al inlicht deur het volk dat hum zien haar, volk uut het dörp dat zuk overal met bemuide? Ze haren het kunnen weten. Al jaoren was e allent en nooit haar e verkering had. Zien moe zee vaak dat e zo’n nuver jong was.
Op schoel haar e zien best daon, bij ’t voetballen was e ien van de beteren. Zien olders waren aaltied wies met hum west en hij herinnerde zukzölf as een wat stil maor niet ongelökkig jongie.
Hij kwam geregeld thuus toen e in de stad studeerde. As zeun was niks op hum an te marken.
Nou was e ik eindelijk niet meer allent, maor weug het vertellen an zien olders hum as een zwaore last op de maag. Wat was e bliede west toen Jan op hum ofkommen was en vraogd haar naor zien wark. Hoe ze saomen in ’t café spreuken over van alles en nog wat. En hoe ze nao weken ronddreien eindelijk tegen mekaar zegd haren dat ze de aander niet meer wollen missen.
Al een half jaor waren ze nou bij mekaor en het was goed west. Nooit haar e in zien leven zo van een aander meins holden. Allent veur zien pap en mam en zien oldere breurs en zus haar e aaltied liefde vuuld, maor nog nooit uutspreuken. Ok zij waren belangriek in zien leven en ze waren goed west veur hum as jongste breurtie.
Hoe kunden ze begriepen dat zien verlangen uutgung naor een aandere man? In ’t dörp was der gieniene die was zoals hij, een homo, een flikker, een mietje um het beroerd te zeggen. Meugliek waren ze der wal west, maor daor weur nooit over spreuken.
An taofel keek zien mam hum an en vreug over wat e allemaaol uutstukte. Over zien wark, de band en over wat e metmaokt haar.
'Het möt', deinkt e en dan kek e naor zien pap die hum tevreden an zit te kieken, trots op zien zeun die het daor in de stad goed döt. Beste meinsen bent het, maor wat zult ze der van begriepen en wat veur verwachtings hebt ze en wat as dat aans uutpakt? ‘Ik mut wat vertellen daj niet mooi vinden zult'. Het komp wat schor uut zien mond. Ze blieft hum ankieken. ‘Ik heb een vriend en leef met hum saomen. Ik ben der gelökkig met, maor jullie vindt het vast niet mooi dat ik aans ben dan de miesten'. Even blef het stil en dan zeg zien pap: ‘Hoelang heb ie derover daon um oes dit te vertellen, mien jong?’ Hij stöttert as e zeg: ‘Lang’. Zien mamme stiet op en komp achter hum staon en slat de arms um hum hen. ‘Wij wussen allang daj homo waren, mien lieverd. Al jaoren wacht wij derop daj oes nou eindelijk wilt vertrouwen.’ Verbiesterd is e as e bedeinkt dat ze dus wussen wel of e was. Dat ze respect haren veur hum zoas e was. Dat ze zo secuur wacht haren tot hij der an toe was um het te vertellen. En dat zien olders last haren van de ofstaand die was ontstaon deur zien zwiegen en hum aaltied gewoonweg bleven zien als zeun die deel was van beiden. Even komp der schaomte over hum. Ik heb ze underschat en te weinig hoog had, deinkt e in een flits. Dan stiet zien pap op en haalt de fles jenever uut de kast en de borrelglassies komt op taofel en dan zeg de olde man een beetie plechtig: ‘Wij drinkt der op daj niet meer allent deur ‘t leven huuft te gaon.’ Even komt der een snik uut zien keel as e de beide olden ankek en zeg, intied het glas hoog holdend: ‘Op mien va en moe, de beste olders van de wereld.’ En dan wat e nooit kun zeggen en nooit zegt haar: ‘Pappe en mamme, ik hol van je beiden.’ ‘En daor giet ‘t maor um,’ is in koor het antwoord.
ZUMMERNOMMEDAG IN JULI
Henk Beuker
Geliek een schilderij leg het dörp te soezen
tusken boskaozie, heide en akker
het is stil en reurloos um de hoezen
en ’t olde mensk under appelboom holdt’ niet wakker…
Een muskie weltert zuk in ’t warme zaand
en in de struuken zingt een liester zien hoogste lied
ok in de strubben is der van allen an de haand
knien, moes en iegelkaor eist daor heur leefgebied…
Um het dörp is der drokte op het laand
de boer is an het heuen of meit zien koren
toerististisch volk stroomt toe van alle kaant
jao, ’n zummernommedag kan mienigien zo slim bekoren…
Tip:
Geef Oeze Volk is kedo aan ien die jaorig is, of trakteer jezölf een keer.
Veur de pries huuf je 't niet te laoten.
|
Maandewark/ Oeze Volk 
