Marrigje Macheltje Kool. Geboren in Beekbergen, opgruid in Brabant, Twente en vanof heur 12e in Zuudwolde. Woont nou in Linde.
Bezöcht nao de ulo de kleuterleidsterskweekschool in Zwolle; warkte vief jaor in het kleuteronderwies, studeerde intussen MO-Nederlands. In 1976 lerares Nederlands in het mbo. Gaf in de jaoren ’80 Drents op de pabo in Meppel. Was gemienteraodslid in Zuudwolde, daorna statenlid en Gedeputeerde veur cultuur van de provincie Drenthe. Is nou warkzaam as dijkgraaf.

Streektaalactiviteiten: maakte zich stark veur het Drents as politieke voertaal en de erkenning van het Nedersaksisch naost het Nederlands en het Fries. Zette zuch in veur minderheden en de multiculturele samenleving. Onder andere as bestuurslid van het Landelijk Steunpunt Educatie Molukkers.

Schreef samen mit Albert Haar het taalcursusboek Samen wieder (1980); lid van de spellingscommssie; mede-oprichter en veurzitter van Het Drentse Boek, mede-oprichter en veurzitter van SONT; mede-oprichter en bestuurslid van Drentse Taol. Vörmde mit Dick Blancke, Albert Haar en Jan Veenstra het politiek-satirische cabaret de Hunebed-Turbo-show, schreef veur Radio Drenthe, liedteksten veur Drentse streektaalzangers, columns veur het Dagblad van het Noorden en was redactielid van Roet.

Debuteerde in 1969 mit het prieswinnende tv-spel Niemandsland. In 1970 verscheen de Nederlandstalige verhalenbundel Liefje, lijden heeft geen kleur, gevolgd deur tal van verhalen en gedichten in literaire tiedschriften. Vanof 1980 ok Drentse verhalen en poëzie in Oeze Volk, Roet, Maandblad Drenthe en bloemlezings; wieder toniel, under meer veur de vrouwentoneelgroep van Erica.

Marga Kool kreeg de Johanna van Burenprijs (veur Nedersaksische literatuur), de Zilveren Anjer en de Culturele Pries van Drenthe.

Belangriekste boekpublicaties

• Achter oen ogen (poëzie, Zuudwolde 1980)
• Opeschoond (verhalen, gedichten, liedteksten, Zuudwolde 1983)
• Hoogspanning (Drentse en Nederlandse poëzie, Zuudwolde 1987)
• Kleine kathedraal (Drentse en Nederlandse poëzie, Zuudwolde 2000).

In 2006 verscheen een Nederlandstalige bundel van Marga Kool: Een kleine wereld (Ambo, 2006).