Home 
Auteurs Boerema, Jannie (1946)
Auteurs Boerema, Jannie (1946) | Boerema, Jannie (1946) |
|
|
|
| maandag 14 juni 2010 | |
|
Jannie Boerema is op 1 jannewaori 1946 in Nörg geboren. Zij komp oet een boerenfemilie. Dat ze nao heur schoelopleiding bij een boekhandel an 't waark geeit, is gien toeval. Ze holdt van boouken. As ze een paor jaor laoter as au pair naor Engeland geeit, gruit heur belangstelling veur de Engelse taol en cultuur. Weerom in Drenthe hef ze in verscheiden dörpen in Noordenveld woond. Tegenwoordig woont ze in Zeijen. In 1980 kommen der tweei Hollaandse boouken oet van Jannie Boerema. Ze zeg zölf dat ze veul had hef an het contact dat ze had met de Drèentse dichter Hans Heijting. Deur hum begunt ze ok in heur mooudertaol, het Noordenvelds, te schrieven. Dit waark komp in Roet, Oeze Volk en een paor blooumlezings. Begun jaoren '90 wordt Jannie Boerema redacteur van het Maondblad Drenthe. Ze maokt veur dat blad interviews met spraokmaokende Drenten. Streektaolactiviteiten: redigeerde Stoelendaans (1985) een boek mit teksten van en informaotie over twintig Drentse schrievers; organiseerde in 1988 Perspextief, een samenwarkingsproject van Drentse kunstenaors en dichters; vertaolde Shakespeare en Oscar Wilde; liedteksten veur Drentse zangers; warkte mit an Wieder met mekaor, een cursusboek Noordenvelds en was ienige tied bestuurslid van de Drentse Schrieverskring. Schreef en publiceerde eerst in het Nederlands. Deur Hans Heyting wezen op de meugelijkheden van heur moedertaol, het Noordenvelds. Gedichten en verhaolen verschienen in Oeze Volk en Roet. In 1985 weur heur (as eerste) de literaire anmoedigingspries van Roet, de Reyner Onno van Ettingenpries toekend.
'Een roze wolk, een sprookiesboouk veur volwossenen', In april 2005 kwam 'Over de regenboog' oet. Een gedichtenbundel waor kleur een belangrieke rol in speult.
Boekpublicaoties.
In oktober 2006 hef Drentse Taol een schrieverspetret van Jannie Boerema maoken laoten. Aj hier klikt dan kooj op Taolpad Drenthe. Aj bij Schrieverij op Norg klikt kuj gedichten heuren die Janny zelf veurles Hieronder kuj een keur oet Jannie zien waark lezen.
Ogen
As ik mien ogen dicht doou dan kan ik je anraoken veuil ik traonen op je wang dan veeg ik ze vot met de binnenkaant van mien haand
As ik mien ogen dicht doou dan hol ik je krampende lichem heuil dicht tegen mij an dan praot ik met joe met de binnenkaant van mien haand
As ik mien ogen dicht doou dan leef je in mij laot jij je leven met mij dan praoten wij met de binnenkaant van onze handen
Viefschaftsnei
Har ik je oppakt en op handen draogen ik was in boeten gaon har ik je in de snei henlegd
Zo lag je op mien laogie witte snei ik plukte viefschaftbessen van de hulst die heb ik in een vaosie teld die heb ik oetstrooid rond de lijnen van je kolde lichem
Toen waren der bessen over en daor heb ik een kussen van maokt onder je stieve scholders en je nek en je dunne grieze haor
Ik heb je leeif en daorom lig je in de viefschaftbessen van de greuine hulst op mien laogie witte snei. Nou is het viefschaftsnei
Oet: Over de regenboog
Woorden op de goldschaol
Woorden op de goldschaol Het is een odyssee dit boouk van vloeibaor lange daogen en het duurt maor; dat riegels woorden wegen van de bodem vortslaogen
As ik zunder geluud was dan zul de echo niet bestaon as jij gien stem meer hadden dan dee 't niet zo verrekte zeer tot dwaars de bodem deur
Dit boouk van vloeibaor lange daogen is een hels en ketsend odyssee en het duurt maor; en het duurt maor, dat wurgende wegen van woorden tot op de bodem van de goldschaol
Oet: Strèupers van de taol
Leeg laand
Daor waor het laand leeg lig is het altied waoter en onder de waoterspeeigel zeei ik je liggen
As het waoter rimpelt lieken je ogen scheeif gekrulde raompies en je holden ze dicht
tusken mien doem en wiesvinger trek ik an je wimpers en maok je ogen lös nou je mij niet zeein willen laot ik je zeein hoou ik as waoter brak en broken mij vaast heuil an het riet
in het vloeiende waoter breek ik je ogen en de vliezen stollen de wimpers op je wang
En het waoter is altied daor waor het laand leeg lig en as ik bij je langes loop zal ik je liggen laoten
Oet: Strèupers van de taol
Ik wil wel stofzoegen en bedden opmaoken en sokken wassen en jenever inschenken en pudding koken en de kat kammen en lang waachten en heksen en eier en mien ogen blauw vaarven op goeie vrijdag
as hij dan maor as hij dan maor mien papaarse rooie jurk oet trekt
Oet: Strèupers van de taol
--------------------------------------------------------------------------------
Tusken blauw en rood
Ik wil niet langer weeiten dat jij zo breekbaor waren hoou gooud ik 't har Dat ik gelukkig was
Ik wil niet langer weeiten hoou breekbaor as ik was toen was jij der veur de leeifste. Dat ik dat was
Ze kun 't misschien niet weeiten hoou breekbaor as jij waren ze kun het breekbaor niet verdraogen. Dat wij dat waren
Oet: Over de regenboog
Een hommage aan Berend Olfert Groen
‘Over de regenboog' is een eerbetoon an Berend Olfert Groen, de schilder die in Zeyen woonde en in 2003 oet de tied kwam. Berend Groen schilderde en tiekende veural Noord-Drèentse landschappen, miestal met beekies. Hie leut over 't algemien alle begruiing vort, waordeur zien schilderijen slim naor de oorsprong weerum gungen. Een warkstuk van Berend Groen stiet op het umslag van ‘Over de regenboog'.
Viefschaftsnei Veurin het boek, op de bladziede waor ok stiet dat het een hommage an Berend Groen is, is het begun van het gedicht ‘Viefschaftsnei' ofdrukt. Dat wil wij je hier ok geern lezen laoten.
Har ik je oppakt en op handen draogen ik was in boeten gaon har ik je in de snei henlegd
Ik har een naom zolang ik leef heb ik een naom in klank en alle kleuren van de regenboog
|
