Home
| ... en in Nörg |
|
|
|
| maandag 23 maart 2009 | |
 Bij de leste Taol an Taofel in Nörg van het seizoen 2008-2009 waren roem 70 bezukers anwezig. Zij geneuten van het boeiende programma mit veurdrachten in het Westerkwartiers, het Zuudwest Drents en het Achterhoeks.
Nao het welkomstwoord van Anne Doornbos introduceerde Martin Koster de 1e gast van dizze mörgen: prozaschriever en dichter Melle Hijlkema uut Trimunt. Hijlkema las twei körte verhalen veur en anslutend enkele gedichten. Dit allemaol in het Westerkwartiers.
De 2e gast was Luuks Nijsingh uut De Balk (Balkbrug). Luuks Nijsingh brengt, samen mit zien pianist John Gaasbeek, zien liedties op een gehiel eigen chanson-achtige menier waorbij het publiek nauw betrökken wordt mit een ofwisseling van ernst en luim. Der weur dan ok volop mitzungen. De 3e gast was Thea Onnink-Stronks. Thea woont al heur hiele leven in de Achterhoek en schref vanof 1995 in het dialect. Ze wun twei keer een schriefwedstried van het Staringinstituut. Ze publiceert regelmaotig in een blad veur een plaatselijk verzorgingshuus. Tiedens dizze Taol an Taofel las ze o.a. een prachtig verhaal over een gesprek mit heur twei katten die naor een verzorgingshuus veur katten gaon zulden. Um roem kwart over twaalf was het tied veur de warme maaltied. Die bestund uut een bal gehakt mit eerpels en witlof mit ham en kees. De bezukers zaten hiervan lekker te smikkeln. Tussendeur was der gelegenheid um de boekentaofel te bekieken. In het 2e diel traden de schrievers en zanger nog een keer op en daornao gungen de meinsen weer op huus an. Een geslaogde ofsluting van het 4e seizoen Taol an Taofel in Nörg. Het Huus van de Taol/Het Drentse Boek bedankt de organisatoren: Janny Roggen, Anne Doornbos en Martin Koster veur al het wark wat ze ofgelopen seizoen veur Taol an Taofel in Nôrg daon hebt. Ok dank an Hendrikus Been die der weer ver zörgd hef dat het geluud tip-top in orde was.     |