Home
| Dik virtig man bij Roetbijeeinkomst |
|
|
|
| maandag 20 oktober 2008 | |
 De redactie van ’t Drents Letterkundig tiedschrift Roet was tevreden met de dik virtig man die zaoterdagmiddag 18 oktober in De Kruimel in Gasselt bij mekaor was.
De middag wör prissenteerd deur de redactieleden Lukas Koops, Jan
Harbers en Ton Peters. Twintig schrievers lazen veur oet eigen waark,
de prachtige meziek kwam van het duo Ballads 2 (Margreet Puite en Petra
Hilbrink) en boetendes wör der ofscheid nommen van Baukje Bloemert.
Baukje hef de leste jaoren in de maande met Ab Drijver boouken
besproken veur Roet. Omreden zij an ’t waark geeit bij het Huus van de
Taol as begeleider van schrievers en de redacties van tiedschriften,
kan en wil zij gien boouken meer bespreken veur Roet.    Om der een jaorlijkse pries van te maoken, hef Abel Darwinkel ’t gedicht De Dapperstraat oetkozen waor elkeneein dan weer een variant op schrieven kun. Van de twintig Nederlaandse en Drèentse inzendings was die van Suze Sanders de mooiste. Hieronder kuj ’t winnende gedicht van Suze Sanders lezen. Domweg bedappern Veur wel wil leven is de dood gien zegen veur hum is alleman of – vrouw geliek en oj nou arm bint of verrekte riek hij komp je op een kwaoie dag integen. Smangs stiet e met zien zende an de diek of giet e langs de smalle binnenwegen kan wezen dat e in de kolde regen zuk schoelholdt in een duuster stadspertiek. En ok al kunj meraokel met hum praoten hij wacht je op in een jeneverfles of gnes naor je op ’t puntien van een mes mor al die tied hej ’t zölf niet in de gaoten. Toch hef hij aaid het allerleste woord as e je met zien liefde domweg smoort. Suze Sanders |