|
Oprichters
Veur 1956 was der in Drenthe gien podium waor schrievers heur waark publiceren kunt. Oetgevers gaven mar mondtiesmaot Drèenstaolig waark oet. In september 1956 wordt het maondblad Oeze Volk opricht deur Hans Heyting, Gerrit Kuipers en Gerard Nijenhuis. De oprichters hadden veur ogen um met Oeze Volk een leegdrempelig en veur elk en eein tougankelijk blad te maoken in de Drèense taol.
Eerste nummer
Dizze dreei maanlie risselveert met 'n kander, zeuikt een oetgever en gaot an 't waark. Oetgever Eerelman oet Stadkanaol duurt het an en het eerste nummer van Oeze Volk komp oet in december 1956.
Gasselternijveen
Nao verloop van tied kriegt Gerard Nijenhuis en Gerrit Kuipers boeten Drenthe een neeie betrekking. Hans Heyting blef alleneg over. In 1966 nemt Bart Veenstra en zien vrouw Martha de redaksie en de administraotsie over. Dit blef de femilie Hadderingh dooun tot en met 31 december 2007. Daorna hef Jent Hadderingh het overneumen.
Stichting
Op 1 janewaori 2008 wordt Oeze Volk een stichting en get over in het Huus van de Taol.
Veurplaot
Karakteristiek veur Oeze Volk was de zwart-wit veurkaant met een foto. Tot eind 1970 is dit een foto van Gerrit Aafs, dan nemt Wim Hidding het over tot en met 2006. Daornao zorgt de neeie redaksieleden Jent Hadderingh en Tjaart Imbos veur de foto's op de veurplaot. Met ingang van meert 2008 verschient der een neie veurplaot in kleur. Foto's veur de veurplaot wordt anleverd deur Drèense amateurfotograofen.
In meert 2008 hef Oeze Volk der een naom bijkregen: Maandewark.
De vörmgeving van het olde Oeze Volk was vanof het begun haost niet veraanderd. De tied hef het herkenbaore grieze bladtie inhaold.
Daorum is de stap zet um ‘fullcolor' en in een neie opmaok te verschienen.
Leegdrempelig en tougankelijk
Maandewark / Oeze Volk gef mensen die schrieft in het Drèens de kaans um te publiceren. Hiermet wul het blad het gebruuk en het lezen en schrieven in de Drèense Taol stimuleren.
Maandewark / Oeze Volk wordt oetgeven deur het Huus van de Taol.
Um die oetgaove meugelk te maoken is der een redaksie en een warkgroep insteld. De redaksie holdt zök gangs met de inhold en kwaliteit van het blad. De warkgroep is drok doende met de Public Relations en ondersteuning van de redaksie.
Stuur je wark in!
Bin je schriever van een gedicht of een verhaol, stuur het dan in veur publicaotie in Maandewark / Oeze Volk. Ok bijdraogen in de vorm van columns, verslaogen en zuks over activiteiten wordt op priessteld. Vanzölf in het Drèents.
De kopij het liefst insturen via e-mail:
Dit e-mail adres is beschermd door spambots, u heeft Javascript nodig om dit onderdeel te kunnen bekijken
Het postadres:
Huus van de Taol
Postbus 163
9410 AD Beilen
0593 371010
En dan?
As de kopij binnenkomp bij het Huus van de Taol kriej altied een bevestiging van ontvangst.
De redaksie bekek vervolgens alles wat of der via de lienpost of de postbus binnen komp.
Wordt je waark plaotst, dan kek een corrector het nao op vörm- en spelfouten. Je kriegt dan gien bericht, maar ziet je inzending vanzelf in Maandewark / Oeze Volk
Veurbehold
De redaksie beholdt zuk het recht veur um angeboden waark niet te plaotsen. Je kriegt schriftelijk bericht van de redaksie as je waark niet plaotst worden kan.
Warkgroepleden en redaksie Maandewark / Oeze Volk:
Redaksie en waarkgroepleden van Maandewark / Oeze Volk bint te bereiken via email:
redactie
Dit e-mail adres is beschermd door spambots, u heeft Javascript nodig om dit onderdeel te kunnen bekijken
of via redaksie Maandewark / Oeze Volk,
Postbus 163,
9410 AD BEILEN.
Roel Reijntjespries
Roel Reijntjes (1923-2003) was een Drèense dichter die veul beteikend hef veur de Drèense literatuur en de Drèense Taol. Hie debuteerde in 1959 met de gedichtenbundel ‘De iegelkaor'. Roel Reijntjes hef ok veul publiceerd in Oeze Volk. Hij hef Oeze Volk een legaat naolaoten, waorvan 't bestuur eeinmaol in de tweei jaor een pries oetlangen moet an eein die zich slim inzet hef veur de streektaol.
Ontvangers van de pries
2004: Wim Hidding oet Gasselte, meer dan 35 jaor fotograof veur Oeze Volk
2006: Martha Hadderingh oet Gasselternijveen. Eigenlieks was de pries veur Bart en Martha beiden veur 40 jaor redaksie en administraotsie en al wat nog meer. Jammer genog hef Bart dit niet meer met muggen maoken. Hie kwam in oktober 2005 oet de tied.
2008: Gerrit Kuipers, mede-oprichter Oeze Volk 
Correctie
Oetgangspunten die correctoren hanteert bij het naokieken op spelling van angeleverde teksten, veurdat zie plaotst wordt in Oeze Volk/Maandewark.
1.Wij broekt ‘Drentse Spelling’ as haandleiding veur het schrieven van alle plaotselijke streektaolen binnen Drenthe.
2.Wij schrieft dicht tegen het Nederlaands an, beveurbield:
Nederlaands: Drents:
prettig prettig
vriendelijk vrundelijk
aardig aordig
3.Liever gien woordtiekens en lettertiekens schrieven, as dat niet persé neudig is.
4.De niet oetspreuken -en wal altieding schrieven; dus poten in stee van poot’n.
5.Bij -eren en -elen, schrief wij: Gastern (Gasteren) en twiefeln (twijfelen).
6.Bij -enen, schrief wij: regen (regenen). Het giet regen. Ok zo bij tieken en zegen.
7.In lettergrepen en an het èende van een woord ao schrieven, en niet oa.
8.Bij een voltooid dielwoord zoas in ‘Ik heb zegd’, een d schrieven en niet een t.
9.De ou-klaank in het Nederlaands, mar in het Drents de ao- of de ò-klaank volgd deur ld of lt, dan in het Drents old of olt schrieven en niet aolde, olle of zukswat.
Dus houden - holden, zouten - zolten, hout - holt, goud - gold, oud - old, koud - kold.
10.De ö (met tuttelties) in beveurbield : törf, zölf, Grönning en het stöf (het stuift).
11.De d-klaank en de f-klaank wal altied schrieven, ok aj die haost niet heurt.
12.De r-klaank wal schrieven, ok al heur ij die aamperan.
13.De g wal altied schrieven, ok al heur ij die mangs een beetie aans; zoas in: wagen, negen, hugen (hunkeren) of togen (zeulen, slepen).
14.De sch-klaank kan broekt worden in woorden die overienkomt met woorden oet het Nederlaands, mar ok in woorden as: mèenschen en tusschen. De sk-klaank mag hier ok.
15.Samentrekkings met ik schrief wij altied: ’k. Dus: heb ik – he’k. Samentrekkings met ij of ie, nao de letter i altied 'j broeken; aans vast schrieven.
16.De letter e wordt ok wal schreven in stee van hie: hef e daor west; dat zeg e.
17.Verkleinwoorden: het grondwoord niet veraandern!
beet - beetien of beetie, dier - diertien of diertie, ding - dinggie of dinggien
18.Verkleinwoorden op -cht, -ft, en -(r)st vervalt de -t bij het schrieven, aj hum niet heurt; waor neudig tredt daornao metklinker-verdubbeling op:locht - lochie(n),kast-kassie of kastien,wicht-wichtien of wichien,nust-nussie of nustien,schoft-schoffie,barst-barsie of barstien
19.Drentse zinsbouw broeken!
Dus: ‘Mooi dat het zo goed gaon is’, in stee van: 'Mooi dat het zo goed is gaon'.
‘Ik heb dan staon laoten’, in stee van: ‘Ik heb dat laoten staon.’
En: ‘Dat hie kommen zul, wus zie’, in stee van ‘Dat hie zul kommen, wus zie.’
20.Voltooide dielwoorden van samenstelde warkwoorden anien schrieven, krek as in het Nederlaands: 'Hie hef metnummen. Zie is vortgaon. Het is deurbreuken.’
21.As in een tekst ienmaol begund is met een bepaolde schriefwieze van een woord, dan niet veraandern beveurbield: eerst maor schrieven, dan mor of mar, of toch mar weer maor.
22.Nao een dubbele punt ( : ) gien heufdletter schrieven. Woj dat toch, dan moej nao de " : " de volgende woorden tusschen apostrofs zetten.
23.Vervang Nederlaandse woorden zoas desalniettemin en eventueel, deur Drentse woorden.
(Koop Bos)
Criteria veur plaotsing in Maandewark/Oeze Volk
Veurof
1. Kopij mag niet striedig wezen met het redactiebeleid.
2. M/OV is een leegdrempelig blad dat veur elk toegankelk is. Het wil de schriever een podium bieden. Kopij die geschikt is, wordt opeslagen in een ‘schrieversmap’. Het kan in ien van de volgende nummers an bod komen, mar ok bewaard worden veur een aander tiedstip. Schrievers kriegt daor gien bericht van.
3. Kopij wordt redigeerd en dan deur de corrector corrigeerd op spelling en taoluniformiteit. Over het leste viendt gien correspondentie plaots met de schriever. De corrector warkt volgens de officiële spellingsregels veur de Drèentse taol. Over het redigeren kan der contact weden.
Uutwarking
1. Kopij mag gien tekst(en) bevatten die godslasternd, discriminerend, kwetsend, beledigend, minachtend, opruiend en/of respectloos e.d. bennen. Ien veurkommend geval beholdt de redactie zuch het recht veur om de schriever een veurstel te doen of ien overleg met de schriever te kommen tot vervanging van de betreffende tekst. De schriever blef eindverantwoordelijke en eigenaor van de kopij en hef altied het recht om niet akkoord te gaon met het wiezigingsveurstel en kan de kopij intrekken.
2. Kopij kan weigerd worden um praktische reden beveurbield umdat der gien ruumte veur is of vunden kan worden, der te veul wark met dezölfde strekking is e.d. en um inholdelijke reden: (nog) langdraodig, niet boeiend, niet pakkend, het raokt niet, onsaomenhangend, structuurloos, volgorde klopt niet en/of verhaolopbouw e.d. klopt niet.
3. Ien veurkommend geval (1 en 2) kreg de schriever een brief met de reden waorom het wark niet plaotst wordt.
4. Schrievers van kopij dat nog niet an de criteria voldöt, kunt contact opnemen met het Huus van de Taol um nao te gaon hoe of heur wark verbeterd worden kan. Zie punt 3.
5. Bovenstaonde mag der niet toe leiden dat de uutgangspunten van M/OV, naomelijk leegdrempelig en veur elk toegankelk, uut het oog verloren worden. De redactie holdt veur ogen dat te plaotsen kopij past binnen het brede scala van schrievers en leesders en mag niet kritisch oordelen op subjectiviteiten as ‘mien smaok niet’, ‘heb der niks met’, etc. De doelstelling moet wezen en blef : ‘veur elk wat wils.’ (Klaas Koops)
Wij kriegt de kopij graag digitaal aneleverd. Stapsgewies giet dat zo:
HULP BIJ DOCUMENTEN-MAILEN
1. Maak een document ( verhaal, of gedicht) an in WORD.
Gebruuk daorbij het lettertypeTimes New Roman – 12.
2. Opslaon: Kies: Bestand – Opslaan als – Mijn Documenten –
(dan: de goeie naam geven) – Opslaan.
3. Maak een nei email-bericht an, via OFFICE.
Vertel daorin wat aj te melden hebt..
4. Voeg an dit email-bericht het document toe
wat aj ók verzenden wilt:
-Klik op het paperclippie, en kies:
dus: het ‘document’ anklikken – Invoegen.
Nou stiet het document as aparte bijlage
bij het email-bericht. (Dat kuj ók zien !)
5. Aj dat wilt, kunt er zo meerdere documenten
an de email toe-evoegd worden.
Ze bint dan ok
deur de ontvanger apart te bekieken en die kan
ze ok apart opslaon en verwarken.
6. Aj zó een email klaor hebt, klik ie op Verzenden.
Inhold
Van elk nummerwordt verhaolen/gedichten op de webstee zet. Zo kriej een indruk van het blad.
Veur nummer 5 is dat:
Teniel in Drenthe
Johan de Noord
In Drenthe bint der
weinig professionele podiumgezelschappen en veur de professionele
kuunstvakopleidings mut oeze kinder de previncie uut. Maor mit het
amateurteniel in Drenthe giet het slim veur de wind ! En dat al jaorenlang
! 's Mangs bint der ambities en wordt
het amateurteniel gebruukt as springplaank naor een groter podium, een groter
pebliek, maor nog meer is dit soort teniel een prachtige expressieve
tiedsbesteding.
De previncie Drenthe telt zu'n 200 tenielgroepen en - verienings. Veul van
die groepen spreekt op het teniel de streektaol die zie van huus uut zo goed
kent en waor de speulers en het pebliek in deinkt en vuult. De uutvoerings bint
het resultaot van weken vol mit repetities en zuks wat meer. Tenielclubs kom wij overal in oes gewest
tegen. Zölfs in de kleine buurtschappen, waor de speulers ‘sjaors een optreden
verzörgt veur heur volk. Miestal wordt
ok speuld in het plaotselijk verzörgingshuus of bejaordencentrum. Een antal
verienings speult heur seizoenstuk meer dan ienmaol. Op een vaste plek veur
pebliek uut de wiede umgeving. Aandern reist mit heur stuk deur de previncie en
steekt zölfs de grens over (bijveurbield naor Grunning en Overiessel en speult
wieder zo non en dan veur Drentse verienings in de grote steden van oes
laand). Wij kent tenielclubs die in de wintermaonden binnen optreedt. Maor der bint ok genog die
heur ‘ding' buuten doet. Hierbij moew deinken an de straottheaters, de
openluchtspeulen en netuurlijk de Drentse wagenspeulen. Het amateurteniel holdt
zuch mit verscheiden genres bezig: zo kenne wij het bestaonde tekstteniel, de
eigen predukties, het experimenteel teniel en de kluchten.
In de jaoren '60 en '70
van de veurige ieuw kreeg het amateurteniel in Drenthe een flinke por in
de rugge deur de komst van professionele understeuning veur dizze kuunstvörm.
De previnciaole tenieladviseurs gungen gangs. Dizze adviseurs beuden
professionele understeuning en verzörgden cursussen, raomregies en de
(landelijk erkende) veerjaorige cursus veur amateurregisseur. Veul van dat soort lu zörgt nou bij
verscheiden groepen en verienings veur neie spelvörms en nei repertoire.
Ok het DCA, Drents Centrum voor Amateurtoneel, hef veul an de ontwikkeling van het
amateurteniel bijdragen. Het DCA hef jaoren de belangen van het amateurteniel
behartigd en hef wieder mooie dinger
organiseerd as: theaterfestivals en wagenspeulen (bijveurbield een kluchtenfestival
en een jongerentheaterfestival). Het DCA is drej jaor leden opheven.
Neie initiatieven
Deur de vergriezing, de veule aandere verleidings in oeze
drokke 24-uurs economie staot veul tenielgroepen under druk. Bestuursleden bint
muilijk te vinden en speulers wilt zuch niet meer veur langere tied an een
groep binden. Daorbij verdwient de olde speulplekken in de dörpen. Maor het is
niet allien maor kommer en kwel. Der bint zat neie initiatieven die het wel
red. Zo kenne wij de Jeugdtheaterschoelen in Assen en Emmen mit honderden
enthousiaste jongelu. Zie bint ‘in' veur
het ‘zelf maken' . Niet klakkeloos an de
slag mit tekstteniel, maor zölf warken en schaoven an tekst, thematiek, decor
en speulplekken. En geleuf: wat een mögelijkheden gef dat veur de toekomst !.
Het Hek van de Dam in Ekehaar zet zuch al jaoren in um juust
een podium te bieden an amateurtenielspeulers in Drenthe. Het Podium in
Hoogeveen prebeert professionele theatermaokers an zuch te binden deur locatie,
technische fasciliteiten en professionele hulp op het gebied van techniek en
promotie te bieden an maokers en speulers. ‘Kunstxilo' in Assen organiseert
sjaors een theaterfestival en een jeugdtheaterfestival. Op beide festivals is
der genog ruumte veur het amateurteniel.
Ok in Assen warkt ‘NizNo', die in meert
2010 beloond wur mit de Aanmoedigingsprijs 2009. NizNo is een theaterwarkplaots
danwal een theatergroep die ‘jong, actueel en ambitieus' theater veur en deur jongelu maokt. NizNo
nuumt zuch mit naodruk ‘maatschappelijk geëngageerd'. De landelijke jury had benaom veul waardering
veur de stimulerende wieze waorop NizNo mit jongeren umgiet en mient dat
jongeren bij NizNo de kaans kriegt zuch goed te ontwikkelen op het gebied van
drama. De juru vindt NizNo een goed landelijk veurbield van een
jongerentheaterwarkplaots. Aandere groepen die opvalt bint: ‘Ontluikend
Bloempje' en ‘Epoi' , groepen die
professionele begeleiding zuukt en heur eigen verhaol wieder uutdiept.
Het beleid van de
overheid
De overheid hef het goed veur mit het amateurveld. De
kommende jaoren warkt het Riek, de Previncie en Gemienten an het verstarken van
de zogenaomde ‘cultuurparticipatie'. De andacht is richt op schoeling,
preduktontwikkeling en het verstarken en uutbreiden van podia. Plannen van
overheden wordt op mekaor aofstemd en der bint financiele middelen veur
vrijmaokt. Extra andacht kriegt kwaliteitsverbetering, ‘crossovers' en
peblieksbereik (‘crossovers' bint
koppelings tussen 2 of meer kunstdisciplines, b.v. teniel en meziek). Der is
een landelijke organisaotie ( ‘Kunstfactor') opricht die neie impulsen geven
zal en anjaoger is van neie initiatieven. Der is wieder een "Fonds
Cultuurpartcipatie' in het leven roepen
um veurbieldprojecten en verneide ideeén financieeel te understeunen. Ok de drej overheden hebt financiele middelen bij mekaor bracht.
Gemienten speult de belangriekste rol op het gebied van cultuurparticipatie.
Tenielverienings en de podia kunt daor heur veurdiel mit doen, umdat de vraog
van de verienings centraol komt te staon.
Kunst & Cultuur
Drenthe
Kunst & Cultuur Drenthe richt zuch op
kwaliteitsverbetering, verneiing en verdieping in het amateurrteniel op grond
van vraogen vanuut het veld. Het theater veur en deur jongeren hef de
aofgelopen jaoren veul andacht had. Nou giet de andacht uut naor
kwaliteitsverbetering van het kader (de regisseur, grimeur, tekstschriever,
bestuursleden en technici). K & C warkt an een saomenwarking mit de
Hogescholen voor de Kunsten um mit heur schoelingsprogramma's op te zetten.
Daornaost spant K & C zuch in um de
amateurtenielwereld saomen te brengen mit de professionele kunsten
(kwaliteitsverhoging en ‘crossovers'). K & C understeunt amateurloketten
die opricht wordt binnen gemienten, waordeur vraogen snel behandeld kunt worden
en neie ontwikkelings rap heur weg vind.
De andacht van K & C zal ok uutgaon naor talenten
(verbinding binnenschoels en buutenschoels/amateurtenielverieniungs) en het
understeunen van podia. Daornaost giet K & C ontmoetings en zuks wat meer
organiseren en wal veur die lu die bij
amateurkunstteniel bint betrökken. Saomen mit het Huus van de Taol en aander
belangstellenden wordt de interesse veur modern streektaoltheater in Drenthe
underzöcht.
Het adres van Kunst
& Cultuur Drenthe is: Dr. Nassaulaan 5,
9401 HJ Assen; tillefoon: 0592 - 336999;
www.kcdr.nl Volk dat vraogen
hef op het gebied van kunst en cultuur (u.a. amateurteniel en zo) of geern
advies wil kan kontakt opnimmen mit K & C.
Wij helpt je geern binnen oeze meugelijkheden.
Johan de Noord,
directeur Kunst & Cultuur Drenthe
Tip:
Geef Oeze Volk is kedo aan ien die jaorig is, of trakteer jezölf een keer.
Veur de pries huuf je 't niet te laoten.
|
Maandewark/ Oeze Volk
