Het Drentse Boek

Nei boek van Klaas Koops

Vrijdag 13 meert komp de neie verhalenbundel, Kattenbende en hondenboel van Klaas Koops uut. Een boekie mit korte verhalen over katten, honden en hun baosies. Klaas is behalve schriever ok een talentvolle tiekenaar en hij hef de illustraties in het boek dus ok zelf emaakt. Veur donateurs van het Huus van de Taol is der goed neis, want Kattenbende en hondenboel is het donateursgeschenk van dit jaor. De donateurs, die € 26,- per jaor betaalt kriegt het boekie binnenkort in de bus. Wie gien donateur is kan vanof vrijdag het boek in de Drentse boekhandels kopen of bij de online boekenwinkel van Het Drentse Boek.

 

Op Stee komp deran!

Vrijdag komp der een machtig mooi boekie uut over plaatsnamen in Grunnen en in Drenthe. Het is een dubbelboek; an de iene kaante Drentse plaatsnamen en aj 't ummedreit wordt der Grunninger plaatsnamen verklaard. Een mooi samenwarkingsverbaand tussen het Huis van de Groninger Cultuur( Siemon Reker en Eline Brontsema) en het Huus van de Taol (Abel Darwinkel)
Via de digitale enquête Vraog&Antwoord is deur 830 sprekers van het Drents en 1068 sprekers van het Grunnings zoveul informatie over plaatsnamen en heur bewoners egeven dat het boek wel tien keer zo dik had kunnen worden. Wi'j het bestellen?

 

Tonko Ufkes prissenteert nei boek.

Op vrijdag 13 febrewari prissenteerde de in Westerkwartier wonende Tonko Ufkes in het Huus van de Groninger Cultuur zien neie verhalenbundel n tuut op beide schelpen. Umdat Tonko uut 't Westerkwartier komp, bint de verhalen ok in ’t Grunnings. Vanwege zien baand mit de Drentse schrieverij en het biezundere van zien taol viendt Het Drentse Boek ‘t belangriek dat dizze verhaolen ebundeld wordt.  Het eerste exemplaar was veur schriever Melle Hylkema. De muziek wordde verzorgd deur Piet Buist en Geert Zijlstra.  Wi'j het boek bestellen?

 

 

Nei boek van Tonko Ufkes

Op 13 febrewari komp de bundel n tuut op beide schelpen uut van Tonko Ufkes. Tonko komp uut Westerkwartier en hef nauwe baanden mit het Drents. Hij publiceert regelmaotig in Roet.

Lees meer...
 

As het er toe döt

Op vrijdagaovend 28 november wordde in Westerbork een nei boekie van het Drentse Boek prissenteerd. As het er toe döt giet over Drentse rouwteksten op kaorten. Veul mooie spreuken en gedichten um te gebruken as meinsen uut de tied ekomen bint.Veur het gemak staot de teksten in diverse streektaalvarianten ofedrukt.

Lees meer...
 

Een warme winter in pries verleegd!

Een warme winter, het boek vol mit verhalen, gedichten en recepten over de feesten in wintermaonden is verleegd in pries van € 18,50 naor € 12,50! Ie kunt dit boek bestellen bij de webwinkel van Het Drentse Boek, www.drentheboeken.com Hartstikke mooi kedogie veur de decembermaond!

 

Streektaalconferentie mit nei boek!

Hef de streektaolschrieverij een tooukomst? Dat is een goeie vraog op het moment dat grote booukwinkels failliet gaon en de verkoop van boouken overaal teruglop. Is der nog wel een markt veur streektaolschrieverij? Hoou komp een streektaolschriever an lezers en an optredens? Hoou kan e de kwaliteit van zien wark verbetern? Zuk soort vraogen kommen an de order op de negende Internationale Streektaolconferentie op 15 november in de Openbare Bibliotheek in Hoogeveen. De bundel Gloepends met de beste literaire verhaolen oet de Nedersaksische literatuur wordt an ‘t èende van de middag prissenteerd.

 

Afhankelijk van Mijnheer den Wind prissenteerd

Afhankelijk van mijnheer den Wind wordde op zaoterdag 25 oktober prissenteerd in d'Olde Karke in Echten. Het boek giet over de verdwenen molens van Echten, Ruinen, Ansen en Pesse. Jan Tissing en Bertus Mos bint de bedeinkers van het boek. Toen Jan Tissing uut de tied kwam hef zien zeun Henk het wark overneumen. Een ontroerend moment was de overhandiging van het eerste exemplaar an Berta Tissing, echtgenote van Jan en moeder van Henk. Het boek is te koop in de boekhandels in Zuud-West Drenthe en bij www.drentheboeken.com. Wieder kuj het boek ok kopen bij het Huus met de Belle in Echten en het TIP-kantoor in Rune.

 

B'ART in de verkoop!

De B'ART is vanof nou te koop in de Drentse boekhandels en bij de webwinkel van Het Drentse Boek! Op 23 oktober is B'ART officieel prissenteerd tiedens het speciale B'ART Event in Cultuurpodium VANSLAG in Borger.

 

Afhankelijk van mijnheer den wind

Een herbouwde meule (De Zaandplatte), een vervallen romp en een stuk of wat meulenstienen en verwiezings in namen, is alles wat rest van de dartien wiendkorenmeulens die de veurmalige gemiente Runen riek was. Op 27 oktober komp bij Het Drentse Boek het boek Afhankelijk van mijnheer den wind. De verdwenen molens van Ruinen, Echten, Pesse en Ansen uut. De samenstellers van het boek bint Bertus Mos, (wijlen) Jan Tissing en Henk Tissing.

Lees meer...
 

Drenthe is best mooi (op Google maps)

Zowat veertig dichters uut en buten Drenthe hebt op heur eigen manier naor Drenthe ekeken en dat in verschillende versvormen beschreven. Het resultaat is een mooie bundel mit Nederlandstalige en Drentse gedichten over oonze provincie samenesteld deur Ton Peters, Gezienus Omvlee, Rob Boudestein en Ben Hoogland. Drenthe is best mooi (op Google Maps) wordt uutegeven deur Het Drentse Boek en komp uut tijdens Naozomerzinnen op 20 september in Zuudlaoren.

Lees meer...
 

Het Huus van hol-an

Gré Seidell-Broekhuizen woont al hiel lange in Noord-Brabant. Ofgelopen week was zij mit heur dochter in Drenthe en kwam even an bij het Huus van de Taol. Schrievers Anneke Mensen en Gerard Nijenhuis scheuven an en zo wordde het een hiel gezellige koffietaofel mit gebak en mooie verhalen.

 

Gerard Stout wint grote Culturele Pries van Drenthe

Schriever Gerard Stout hef de Grote Culturele Prijs van Drenthe ewunnen. Het is de belangriekste culturele oeuvrepries van Drenthe.Veural nao het verschienen van zien novelle In Paradisum en aandere Drentse en Nederlandse novelles en romans wordt Gerard Stout deur veulen eziene as de belangriekste schriever van Drenthe. Wij fielsieteert Gerard van harte mit dizze pries.

 

Jan Germs prissenteert nei boek

Jan Germs prissenteerde tijdens het Lös Huus van 24 mei zien neie boek Ok in paradies bint zoere appels. Het eerste exemplaar wordde anebeuden an schoenspecialist Jan Schutrups uut Exloo. Ie kunden het boek daorna veur een mooi priesie kopen en de zoere appels gungen dan ok as zute broodties over de toonbaank. Woj het boek ok hebben? Vanof 26 mei bij de Drentse Boekhandels en vanzelf kuj het boek ok via de webwinkel kopen!

Lees meer...
 

Ok in het paradies bint zoere appels

Op 24 mei, ja tijdens het Lös Huus, wordt het neie boek van Jan Germs prissenteerd. Het boek giet Ok in het paradies bint zoere appels heten en stiet vol mit korte verhalen over de belevenissen van de schriever. Schaterlach, glimlach en kloete in de hals wisselt mekaar of aj dit neie boek van Jan Germs leest. En umdat het vlak veur die daotum uutkomp is het ok nog ies een merakel mooi vaderdagcadeau!

 

Willem Pol oet de tied komen

Vleden week is nao een körte periode van zeeikte de Drèentse schriever Willem Pol oet de tied kommen. Willem Pol was een vrolijke, slim actieve man die altied gangs was met zien leeifhebberijen de motorsport, lokaole geschiedenis en de Drèentse taol. Willem is 78 jaor worden. Wij wèensen zien kinder, kleinkinder, vriendin en de rest van de femilie veul staarkte.

Lees meer...
 

Suze Sanders wint Streektaalpries Dagblad van het Noorden

In Slochtern weur zundag 30 meert veur de 9e achterienvolgende keer de Streektaalpries van het Dagblad van het Noorden uutereikt. Juryveurzitter Erik van Oosterhout maakte de prieswinnaars bekend: In de categorie Literatuur gung de pries naor Suze Sanders mit de bundel Veenbraand en in de categorie Muziek naor Jan Henk de Groot mit de cd Weer Om.
Wij feliciteert Suze Sanders van harte mit dizze Streektaalpries. Wij hoopt dat wij nog veul van heur mooie gedichten publiceren magt! Woj Veenbraand kopen?

 

Lees meer...
 

De Kok en de verteller in Vries

Roel Kuper en Jans Polling verzorgden op maandag 17 meert veur de Vrouwen van Nu in Vries een kostelijke aovend. Onder leiding van kok Kuper wordden de heerlijkste happies bereid en verteller Jans Polling zorgde veur smakelijke eetverhalen. Wie het thuus nog ies weer proberen wol, kocht het boekie De kok en de verteller.

 

Lokroup van een fladdervlinder: donateursgeschenk van 2014

CoverFladdervlinderwebenannekeVandaag of morgen wordt bij oonze donateurs het jaorlijks kedogie bezorgd. Zoas ieder jaor is dat een nei Drents boek. Dit jaor is Lokroup van een fladdervlinder van Anneke Mensen uutekeuzen. Wij wenst de ontvangers veul leesplezier. Aj gien donateur bint, maar ie wilt het boekie wel graag hebben kuj hum in de Drentse boekhandels kopen of bij de webwinkel van Het Drentse Boek.Of ie wordt gewoon donateur!

 

Strunen in de Taoltuun prissenteerd

In de Statenzaal van het provinciehuus in Assen wordde woensdag 12 meert Strunen in de Taoltuun prissenteerd. Jan Germs introduceerde het boek an de Statenleden en vertelde over 'tuunman' en schriever Abel Darwinkel die deur zien gestruun in de Drentse Taaltuun een geweldige kennis opebouwd hef van de Drentse Taal. Veur alle statenleden was der een boekie. Wi'j hum ok bestellen?

 
Pagina 1 van 9
De activiteiten van het Huus van de Taol en Het Drentse Boek wordt mit meugelk maakt deur financiële ondersteuning van de provincie Drenthe.

Tijdschriften

  • Tijdschriften Oeze Volk en Roet
  • Tijdschriften Oeze Volk en Roet
  • Tijdschriften Oeze Volk en Roet

Webwinkel Boeken

Ga naar

logo-hvdt-140
logo_kiepshop